ബെര്‍ലിനില്‍ ക്രിസ്മസ് ചന്തയിലെ ആക്രമണം; പ്രതിയെന്ന് സംശയിക്കുന്നയാളെ വെടിവെച്ചു കൊന്നു
പ്രതിയെന്ന് സംശയിക്കുന്നയാളെ വെടിവെച്ചു കൊന്നു
ബെര്‍ലിനില്‍ ക്രിസ്മസ് ചന്തയില്‍ ആക്രമണം നടത്തിയ സംഭവത്തില്‍ പ്രതിയെന്ന് സംശയിക്കുന്നയാളെ വെടിവെച്ച് കൊന്നതായി റിപ്പോര്‍ട്ട്. വടക്കന്‍ ഇറ്റലിയിലെ മിലാനില്‍ വെച്ചാണ് അക്രമിയെന്ന് സംശയിക്കുന്ന അനിസ് എന്നയാളെ പൊലീസ് ഏറ്റുമുട്ടലില്‍ കൊലപ്പെടുത്തിയത്.
വെള്ളിയാഴ്ച പുലര്‍ച്ചെ ആയിരുന്നു സംഭവം. വാഹനപരിശോധനയ്ക്കിടെ സംശയം തോന്നിയ ഇയാളെ ഉദ്യോഗസ്ഥര്‍ തടയുകയായിരുന്നു. തുടര്‍ന്ന് ഇയാള്‍ പൊലീസുകാര്‍ക്ക് നേരെ വെടിയുതിര്‍ത്ത് രക്ഷപ്പെടാന്‍ ശ്രമിച്ചു. ഇതിനെ തുടര്‍ന്ന് ഇയാളെ പൊലീസ് വെടിവെച്ചു കൊല്ലുകയായിരുന്നു.
ജര്‍മ്മനിയുടെ തലസ്ഥാനമായ ബെര്‍ലിനില്‍ തിങ്കളാഴ്ച രാത്രി ആയിരുന്നു സംഭവം നടന്നത്. ക്രിസ്മസ് ചന്തയിലേക്ക് ട്രക്ക് ഓടിച്ചു കയറ്റുകയായിരുന്നു. 12 പേര്‍ ആയിരുന്നു സംഭവത്തില്‍ കൊല്ലപ്പെട്ടത്. അമ്പതോളം പേര്‍ക്ക് പരുക്കേല്‍ക്കുകയും ചെയ്തിരുന്നു.
