ഈ വര്‍ഷം മമൂട്ടിയുടെ കരിയറിലെ ഏറ്റവും മികച്ച വര്‍ഷങ്ങളിലൊന്നാണ്. ദി ഗ്രേറ്റ്ഫാദര്‍ എന്ന മമ്മൂട്ടിച്ചിത്രം മലയാള സിനിമയുടെ ചരിത്രത്തിലെ പല കളക്ഷന്‍ റെക്കോര്‍ഡുകളും ഭേദിച്ചാണ് പ്രയാണം നടത്തിയത്. ഇപ്പോഴും ചിത്രം പ്രമുഖ കേന്ദ്രങ്ങളില്‍ പ്രദര്‍ശനം തുടരുന്നു.
ജനുവിനായ കഥയും മികച്ച തിരക്കഥയും നല്ല മേക്കിംഗുമാണെങ്കില്‍ കുടുംബപ്രേക്ഷകര്‍ കൂട്ടത്തോടെ തിയേറ്ററുകളിലേക്ക് ഒഴുകിയെത്തുമെന്നതിന് ഏറ്റവും പുതിയ ഉദാഹരണമായി ഗ്രേറ്റ്ഫാദര്‍. ചിത്രം കുടുംബപ്രേക്ഷകര്‍ ഏറ്റെടുത്ത് 50 കോടി ക്ലബില്‍ എത്തിച്ചു.
ഈ മുന്നേറ്റത്തെ ആവേശത്തോടെയാണ് മമ്മൂട്ടി ക്യാമ്പ് കാണുന്നത്. ഈ വിജയത്തില്‍ നിന്ന് തുടക്കം കുറിച്ചുകൊണ്ട് പുതിയ വന്‍‌കരകള്‍ തേടുകയാണ് മഹാനടന്‍. ഉദയ്കൃഷ്ണയുടെ തിരക്കഥയില്‍ അജയ് വാസുദേവ് സംവിധാനം ചെയ്യുന്ന ‘എഡ്ഡി’ ഗ്രേറ്റ്ഫാദറിന്‍റെ കരുത്തനായ പിന്‍‌ഗാമിയായാണ് ഏവരും കാണുന്നത്.
മലയാളത്തിന്‍റെ അടുത്ത ഇന്‍ഡസ്ട്രി ഹിറ്റായി എഡ്ഡി മാറുമെന്നാണ് സൂചന. ഈ സിനിമയില്‍ മമ്മൂട്ടിയുടെ സൂപ്പര്‍ ആക്ഷന്‍ രംഗങ്ങളുണ്ട്. മാസ് ഡയലോഗുകളും നല്ല പാട്ടുകളും ആവേശമുണര്‍ത്തുന്ന നൃത്തരംഗങ്ങളുമുണ്ട്. പുലിമുരുകന് ശേഷം ഉദയ്കൃഷ്ണയുടെ തൂലികക്കരുത്തില്‍ ഒരു വമ്പന്‍ ഹിറ്റിന് സാധ്യത തെളിയുകയാണ്.
ഷാംദത്തിന്‍റെ സ്ട്രീറ്റ് ലൈറ്റ്, ശ്യാംധറിന്‍റെ ഫാമിലി ചിത്രം എന്നിവയും ഈ വര്‍ഷത്തെ വമ്പന്‍ ഹിറ്റ് പ്രതീക്ഷകളാണ്. പ്രിയദര്‍ശന്‍, സിദ്ദിക്ക്, രണ്‍ജി പണിക്കര്‍ തുടങ്ങിയ വമ്പന്‍ സംവിധായകരും മമ്മൂട്ടിയുടെ ഡേറ്റിനായി കാത്തിരിക്കുകയാണ്.
