കഴിഞ്ഞദിവസമാണ് മേപ്പടിയാന്‍ റിലീസിനൊരുങ്ങുന്ന വിവരം ഉണ്ണി മുകുന്ദന്‍ കൈമാറിയത്. വളരെ വേഗത്തില്‍ പോസ്റ്റ് പ്രൊഡക്ഷന്‍ ജോലികള്‍ പുരോഗമിക്കുകയാണ്. അടുത്തിടെ പുറത്തിറങ്ങിയ ആദ്യ ഗാനത്തിനും മികച്ച സ്വീകാര്യതയാണ് ലഭിച്ചത്. ലൊക്കേഷനില്‍ ഞങ്ങള്‍ ആസ്വദിച്ചത് പോലെ സിനിമ നിങ്ങളും ഇഷ്ടപ്പെടും എന്നാണ് ഉണ്ണി മുകുന്ദന്‍ പറഞ്ഞത്. ഇപ്പോളിതാ 'മേപ്പടിയാന്‍' ഷൂട്ടിംഗ് ഓര്‍മ്മകളിലാണ് നടന്‍ സൈജു കുറുപ്പ്. സിനിമയിലെ തന്റെ രൂപവും അദ്ദേഹം വെളിപ്പെടുത്തി.
ഉണ്ണി മുകുന്ദന്‍ അവതരിപ്പിക്കുന്ന ജയകൃഷ്ണന്‍ എന്ന കഥാപാത്രത്തിന്റെ അടുത്ത സുഹൃത്ത് ആയിട്ടാണ് സൈജു കുറുപ്പ് വേഷമിടുന്നത്.
വിഷ്ണു മോഹന്‍ തിരക്കഥയെഴുതി സംവിധാനം ചെയ്യുന്ന ചിത്രം നിര്‍മ്മിക്കുന്നത് ഉണ്ണിമുകുന്ദന്‍ തന്നെയാണ്.സാധാരണക്കാരനായ ജയകൃഷ്ണന്‍ തന്റെ ജീവിതത്തിലെ അപ്രതീക്ഷിത സംഭവങ്ങളെ എങ്ങനെ മറികടക്കുന്നു എന്നതാണ് കഥ.ഇന്ദ്രന്‍സ്, അജു വര്‍ഗീസ്, അഞ്ജു കുര്യന്‍, വിജയ് ബാബു,മേജര്‍ രവി, കലാഭവന്‍ ഷാജോണ്‍,ശ്രീജിത് രവി, അപര്‍ണ ജനാര്‍ദ്ദനന്‍, നിഷ സാരംഗ്, കോട്ടയം രമേഷ്, പോളി വല്‍സന്‍ തുടങ്ങിയവരാണ് ചിത്രത്തില്‍ പ്രധാന വേഷങ്ങളിലെത്തുന്നത്.
