മമ്മൂട്ടിയുടെ അടുത്ത റിലീസ് ഏതാണ്? ആരും കണ്ണുംപൂട്ടി പറയുന്ന ഉത്തരം ‘മാസ്റ്റര്‍ പീസ്’ എന്നായിരിക്കും. ഉദയ്കൃഷ്ണയുടെ തിരക്കഥയില്‍ അജയ് വാസുദേവ് സംവിധാനം ചെയ്ത ആ സിനിമ പക്ഷേ ഉടനെ റിലീസ് ചെയ്യുന്നില്ല. ചിത്രം ക്രിസ്മസിനേ പ്രദര്‍ശനത്തിനെത്തുന്നുള്ളൂ.
അപ്പോള്‍ അതിനുമുമ്പ് ഒരു മമ്മൂട്ടിച്ചിത്രം പ്രതീക്ഷിക്കാമോ? തീര്‍ച്ചയായും പ്രതീക്ഷിക്കാം, ഒന്നല്ല രണ്ടുപടം. അതേ, ‘സ്ട്രീറ്റ് ലൈറ്റ്സ്’ എന്ന സിനിമയാണ് മമ്മൂട്ടിയുടെ അടുത്ത റിലീസ്. മലയാളത്തില്‍ എത്തുന്ന അന്നുതന്നെ തമിഴ് പതിപ്പും റിലീസ് ചെയ്യും.
ക്യാമറാമാന്‍ ഷാംദത്ത് ആദ്യമായി സംവിധാനം ചെയ്യുന്ന ചിത്രം ഒരു ഡാര്‍ക്ക് ത്രില്ലറാണ്. ചിത്രം നിര്‍മ്മിച്ചിരിക്കുന്നതും മമ്മൂട്ടി തന്നെ.
താന്‍ സംവിധാനം ചെയ്യുന്ന ആദ്യ സിനിമയില്‍ മമ്മൂട്ടി നായകനാകണമെന്നായിരുന്നു ഷാംദത്തിന്‍റെ ആഗ്രഹം. അതിനായി മമ്മൂട്ടിയുടെ അടുക്കല്‍ കഥ പറയാനെത്തി. പറഞ്ഞ കഥ കേട്ട് ത്രില്ലടിച്ച മമ്മൂട്ടി “ഈ സിനിമ എത്ര പെട്ടെന്ന് തുടങ്ങാന്‍ പറ്റും?” എന്നാണ് അന്വേഷിച്ചത്. മാത്രമല്ല, കഥയില്‍ ആവേശം കയറിയ മമ്മൂട്ടി താന്‍ തന്നെ പടം നിര്‍മ്മിക്കാമെന്നും അറിയിച്ചു.
രണ്ട് ഭാഷകളിലും രണ്ട് വ്യത്യസ്ത നിര താരങ്ങളാണ് സ്ട്രീറ്റ് ലൈറ്റ്സില്‍ അഭിനയിച്ചിരിക്കുന്നത്. ഈ സിനിമയില്‍ ഒരു നായിക ഇല്ല എന്നതും പ്രത്യേകതയാണ്. 35 ദിവസം കൊണ്ട് ഷാംദത്ത് ചിത്രീകരണം പൂര്‍ത്തിയാക്കി.
നവംബര്‍ ആദ്യവാരം പ്രദര്‍ശനത്തിനെത്തുന്ന സിനിമ ത്രില്ലര്‍ പ്രേമികള്‍ക്ക് ഒരു വിരുന്നായിരിക്കും എന്ന് പ്രതീക്ഷിക്കാം.
