ബാഹുബലി 2 ലോകമാകെ തരംഗം തീര്‍ക്കുകയാണ്. ഇതുവരെ മൊത്തം 1000 കോടിയുടെ ബിസിനസ് നടന്നുവെന്നാണ് റിപ്പോര്‍ട്ട്. ഇന്ത്യന്‍ സിനിമയില്‍ ഇത്തരമൊരു അത്ഭുതം ഇതാദ്യമാണ്. എന്തായാലും ഇതിന്‍റെ തുടര്‍ച്ച ഉണ്ടാകാന്‍ പോകുന്നത് മലയാളത്തിലാണ്.
ബാഹുബലിയുടെ പ്രൊജക്ട് ഡിസൈനറായ സാബു സിറിള്‍ ഇനി ചെയ്യാന്‍ പോകുന്നത് രണ്ട് വമ്പന്‍ സിനിമകളാണ്. രണ്ടും മലയാളത്തിലാണ് എന്നുമാത്രമല്ല, രണ്ടിലും നായകന്‍ മോഹന്‍ലാലുമാണ്.
വി എ ശ്രീകുമാര്‍ മേനോന്‍ സംവിധാനം ചെയ്യുന്ന ഒടിയന്, മഹാഭാരതം എന്നിവയാണ് സാബു സിറിളിന്‍റെ അടുത്ത പ്രൊജക്ടുകള്‍. ഒടിയന് 50 കോടിയാണ് ബജറ്റെങ്കില്‍ മഹാഭാരതത്തിന് 1000 കോടിയാണ് ചെലവ്.
ഒടിയന് ഒരു ഫാന്‍റസി ചിത്രമാണെങ്കില്‍ രണ്ടാമൂഴത്തെ അടിസ്ഥാനമാക്കിയാണ് മഹാഭാരതം ഒരുങ്ങുന്നത്. ബാഹുബലിയെക്കാള്‍ വലിയ ദൃശ്യവിസ്മയമാക്കി എങ്ങനെ മഹാഭാരതത്തെ മാറ്റാം എന്നതാണ് സാബു സിറിളിന്‍റെ മുമ്പിലുള്ള വെല്ലുവിളി.
അയ്യര്‍ ദി ഗ്രേറ്റ്, അമരം, അങ്കിള്‍ ബണ്‍, ധ്രുവം, അദ്വൈതം, മിന്നാരം, തേന്‍‌മാവിന്‍ കൊമ്പത്ത്, സൈന്യം, കാലാപാനി, ചന്ദ്രലേഖ തുടങ്ങിയ ഒട്ടേറെ മലയാളം ഹിറ്റുകളുടെ കലാസംവിധായകനായിരുന്നു സാബു സിറിള്‍. പിന്നീട് വിരാസത്, പുകാര്‍, ഹേ റാം, ഹേരാ ഫേരി, അശോക, ഹംഗാമ, യുവ, ഹല്‍ഛല്‍, ഗുരു, ഓം സാന്തി ഓം, രാ.വണ്‍, ക്രിഷ് 3, കന്നത്തില്‍ മുത്തമിട്ടാല്‍, ബോയ്സ്, അന്നിയന്‍, എന്തിരന്‍, കാഞ്ചിവരം, ലിങ്കാ തുടങ്ങിയ അന്യാഭാഷാ സിനിമകളിലൂടെ ഇന്ത്യയിലെ ഒന്നാം നമ്പര്‍ പ്രൊഡക്ഷന്‍ ഡിസൈനറായി സാബു സിറിള്‍ മാറി. ബാഹുബലി സീരീസിലൂടെ എതിരാളികളില്ലാത്ത വ്യക്തിത്വമായും സാബു സിറിള്‍ മാറി.
