കേരളത്തിലെ ബീഫ് വരട്ടിയതിന്റെ ബിഗ് ഫാനാണ് ഞാന്‍ , അത് നിരോധിച്ചിട്ടില്ലല്ലോ? : റാണ ചോദിക്കുന്നു
കൊതിപ്പിക്കുന്ന നാടാണ് കേരളമെന്ന് ബാഹുബലി വില്ലന്‍
മലയാളികളുടെ വികാരമാണ് ബീഫ്. അത് അടുത്തിടെ ലോകശ്രദ്ധ പിടിച്ചു പറ്റുകയും ചെയ്തു. അതുകൊണ്ടാണ് കേന്ദ്ര സര്‍ക്കാര്‍ ഇന്ത്യയില്‍ ബീഫ് നിരോധിച്ചപ്പോള്‍ കേരളത്തില്‍ മാത്രം ഇത്രയേറെ പ്രതിഷേധങ്ങ‌ള്‍ അരങ്ങേറിയത്. മലയാളികള്‍ക്ക് മാത്രമല്ല, കേരളത്തിനു പുറത്തുള്ളവരും മലയാളികളുടെ ബീഫിന്റെ ആരാധകരാണ്.
രാജമൌലി സംവിധാനം ചെയ്ത ബാഹുബലിയിലെ വില്ലന്‍ റാണ ദഗുബട്ടി കേരളത്തിലെ ബീഫിന്റെ കടുത്ത ആരാധകനാണ്. ‘ കൊതിപ്പിക്കുന്ന നാടാണ് കേരളം. കേരളത്തില്‍ കിട്ടുന്ന ബീഫ് വരട്ടിയതിന്റെ ബിഗ് ഫാനാണ് ഞാന്‍. അല്ല, അതവിടെ ഇപ്പോഴും നിരോധിച്ചിട്ടില്ലല്ലോ ല്ലേ..?’ അദ്ദേഹം ചോദിക്കുന്നു.
വനിതയ്ക്ക് നല്‍കിയ അഭിമുഖത്തിലാണ് റാണ കേരളത്തെ കുറിച്ചും ബീഫിനെ കുറിച്ചും വ്യക്തമാക്കുന്നത്. കേരളവും മലയാള സിനിമകളും തനിക്കിഷ്ടമാണെന്നും റാണ വ്യക്തമാക്കുന്നു.
