തോപ്പിൽ ജോപ്പൻ 50 കോടി ക്ലബ്ബിൽ!
50 കോടി ക്ലബ്ബിൽ ഇടംപിടിച്ച് മമ്മൂട്ടി ചിത്രം!
മോഹൻലാലിന്റെ പുലിമുരുകനൊപ്പം ജൈത്രയാത്ര ആരംഭിച്ച മമ്മൂട്ടി ചിത്രം തോപ്പിൽ ജോപ്പൻ ഇപ്പോഴും തേരോട്ടം തുടരുകയാണ്. 50 ദിവസങ്ങൾ പിന്നിടുമ്പോഴും തോപ്പിൽ ജോപ്പൻ തലയുയർത്തി തന്നെയാണ് നിലയുറപ്പിച്ചിരിക്കുന്നത്. ചിത്രത്തിന്റെ ബോക്സ് ഓഫീസ് കളക്ഷൻ എത്രയാണെന്ന് പരിശോധിച്ചാൽ 51.30 കോടി എന്നാണ് വിക്കീപീഡിയയിൽ പറയുന്നത്. അതേസമയം, നിലവിൽ 20 കോടിയിൽ താഴെയാണ് ജോപ്പന്റെ മുഴുവൻ കളക്ഷനെന്നാണ് പൊതുവിൽ അറിവായിട്ടുള്ള വിവരം. എന്നാൽ, എങ്ങനെയാണ് വിക്കീപീഡിയയിൽ 50 കോടിക്ക് മുകളിൽ കളക്ഷൻ റിപ്പോർട്ട് ചെയ്തതെന്ന് വ്യക്തത വന്നിട്ടില്ല.
മമ്മൂട്ടിയുടെ ഈ കോമഡി എന്‍റര്‍ടെയ്നര്‍ ആദ്യ പത്തുദിവസങ്ങള്‍ക്കുള്ളില്‍ തന്നെ നിര്‍മ്മാതാവിന് ലാഭം നേടിക്കൊടുത്ത സിനിമയാണ്. കുടുംബ പ്രേക്ഷകർ ഇരുകയ്യും നീട്ടി സ്വീകരിച്ച ചിത്രം ആദ്യ വാരങ്ങളിൽ മികച്ച കളക്ഷനായിരുന്നു നേടിയത്. ഇപ്പോഴും ചിത്രത്തിന് അമ്പത് ശതമാനത്തിലധികം കളക്ഷനുണ്ട്. മമ്മൂട്ടി - ജോണി ആന്‍റണി ടീം വീണ്ടും വരുന്നത് കാത്തിരിക്കുകയാണ് പ്രേക്ഷകര്‍. അടുത്ത വര്‍ഷം അതുണ്ടാകുമെന്ന് പ്രതീക്ഷിക്കാം.
ജോപ്പനും ജോപ്പന്റെ മദ്യപാനവും പ്രണയവും നല്ല പാട്ടുകളുമൊക്കെയായി മമ്മൂട്ടി ആരാധകര്‍ക്ക് എന്നും ഓര്‍ത്തിരിക്കാന്‍ പറ്റിയ ഒരു സിനിമയാണ് തോപ്പില്‍ ജോപ്പനിലൂടെ ജോണി ആന്‍റണി സമ്മാനിച്ചത്. മമ്മൂട്ടി - ജോണി ആന്‍റണി ടീം മലയാള സിനിമയുടെ മിനിമം ഗ്യാരണ്ടി കൂട്ടുകെട്ടാണ്.
