കോഹ്‌ലിക്കരുത്തില്‍ ഇന്ത്യയ്ക്ക് 8 വിക്കറ്റിന്റെ ത്രസിപ്പിക്കുന്ന ജയം; പരമ്പര
വെസ്റ്റ് ഇന്‍ഡീസിനെ പൊളിച്ചടുക്കി ഇന്ത്യയ്ക്ക് 8 വിക്കറ്റ് ജയം
വിമര്‍ശകരുടെ വായടിപ്പിച്ച് നായകന്‍ വിരാട് കോഹ്ലി നേടിയ സെഞ്ചുറിയുടെ കരുത്തില്‍ വെസ്റ്റ് ഇന്‍ഡീസിനെതിരായ ഏകദിന പരമ്പരയിലെ അവസാന മത്സരത്തില്‍ ഇന്ത്യക്ക് ജയം. വിന്‍ഡീസ് ഉയര്‍ത്തിയ 206 റണ്‍സ് എന്ന വിജയലക്ഷ്യം 79 പന്തും എട്ടു വിക്കറ്റും ബാക്കി നിര്‍ത്തിയാണ് ഇന്ത്യ മറികടന്നത്. 111 റണ്‍സുമായി പുറത്താകാതെ നിന്ന നായകന്‍ കോഹ്ലിയും അര്‍ധസെഞ്ചുറി നേടിയ ദിനേശ് കാര്‍ത്തിക്കുമാണ് ഇന്ത്യന്‍ ജയം അനായാസമാക്കിയത്. ജയത്തോടെ അഞ്ച് മത്സര പരമ്പര ഇന്ത്യ 3-1ന് സ്വന്തമാക്കുകയും ചെയ്തു.
അഞ്ചാം ഏകദിനത്തിൽ ആദ്യം ബാറ്റു ചെയ്ത വെസ്റ്റ് ഇൻഡീസിനെ മുഹമ്മദ് ഷമിയും ഉമേഷ് യാദവും ചേർന്നാണ് 50 ഓവറിൽ ഒൻപതിന് 205ൽ ഒതുക്കിയത്. ഓപ്പണർ കൈൽ ഹോപിന്റെ (46) ഇന്നിങ്സും വിക്കറ്റ് കീപ്പർ ബാറ്റ്സ്മാൻ ഷായ് ഹോപ് നേടിയ അർധസെഞ്ചുറിയും (51) ആണ് വിൻഡീസിനെ ഈ നിലയിലെത്തിച്ചത്. 48ന് നാലുവിക്കറ്റ് വീഴ്ത്തിയ ഷമിയും 53ന് മൂന്നുവിക്കറ്റ് സ്വന്തമാക്കിയ ഉമേഷ് യാദവുമാണ് വിന്‍ഡീസിനെ തകര്‍ച്ചയിലേക്ക് തള്ളിവിട്ടത്. ജഡേജ രണ്ടും പാണ്ഡ്യ, കേദാർ ജാദവ് എന്നിവർ ഓരോ വിക്കറ്റ് വീതവും നേടി.
