വെസ്റ്റ് ഇൻഡീസിനെതിരായ 3 ടെസ്റ്റ് മത്സരങ്ങളടങ്ങിയ പരമ്പരയും അടിയറവ് വെച്ച് ഇംഗ്ലണ്ട്. സെന്റ് ജോര്‍ജ്‌സ് നാഷണല്‍ ക്രിക്കറ്റ് സ്‌റ്റേഡിയത്തില്‍ നടന്ന മൂന്നാം ടെസ്റ്റിൽ 10 വിക്കറ്റിനായിരുന്നു വെസ്റ്റിൻഡീസിന്റെ വിജയം. ആദ്യ രണ്ട് ടെസ്റ്റ് മത്സരങ്ങളും സമനിലയിൽ അവസാനിച്ചിരുന്നു.
വിഡീസ് ക്യാപ്റ്റന്‍ ക്രെയ്ഗ് ബ്രാത്‌വെയ്റ്റ് പരമ്പരയിലെ താരമായി തിരെഞ്ഞെടുക്കപ്പെട്ടു. മൂന്നാം ടെസ്റ്റ് മത്സരത്തിൽ രണ്ടാം ഇന്നിംഗ്‌സില്‍ സന്ദര്‍ശകരെ 120 പുറത്താക്കിയ വിന്‍ഡീസിന് 28 റണ്‍സ് മാത്രമാണ് ജയിക്കാന്‍ വേണ്ടിയിരുന്നത്. ഇത് ഒരു വിക്കറ്റ് നഷ്ടമാവാതെ വിൻഡീസ് സ്വന്തമാക്കുകയായിരുന്നു.
വിൻഡീസിനെതിരായ ടെസ്റ്റ് പരമ്പരയും നഷ്ടമായതോടെ ജോ റൂട്ടിന് ഇംഗ്ലണ്ട് നായകസ്ഥാനം നഷ്ടമായേക്കും എന്നാണ് പുറത്തുവരുന്ന റിപ്പോർട്ട്. നേരത്തെ ഓസീസിനെതിരായ ആഷസ് പരമ്പരയിൽ ദയനീയമായി പരാജയപ്പെട്ടതിനെ തുടർന്ന് ജോ റൂട്ടിനെ ക്യാപ്‌റ്റൻ സ്ഥാനത്ത് നിന്നും പുറത്താക്കണമെന്ന വാദം ശക്തമായിരുന്നു. വിൻഡീസിനെതിരായ ടെസ്റ്റ് പരമ്പര കൂടി കൈവിട്ടതോടെ നായകസ്ഥാനം ജോ റൂട്ടിന് നഷ്ടപ്പെടാനാണ് സാധ്യതയേറെയും.
