ഇന്ത്യക്കെതിരെ 8 സെഞ്ചുറികളാണ് സ്മിത്ത് നേടിയിരിക്കുന്നത്. ടെസ്റ്റ് കരിയറിലെ തന്റെ 27ആം സെഞ്ചുറിയാണിത്. ഇതോടെ ടെസ്റ്റിലെ സെഞ്ചുറികളുടെ എണ്ണത്തിൽ ഇന്ത്യൻ നായകൻ വിരാട് കോലിക്കൊപ്പം എത്താനും സ്മിത്തിന് സാധിച്ചു. 2019 സെപ്‌റ്റംബറിലായിരുന്നു സ്മിത്തിന്റെ അവസാന സെഞ്ചുറി.
27 സെഞ്ചുറികൾ നേടാൻ കോലിക്ക് 87 ടെസ്റ്റുകൾ വേണ്ടിവന്നപ്പോൾ 76 ടെസ്റ്റുകളാണ് സ്മിത്തിന് വേണ്ടിവന്നത്. 136 ഇന്നിങ്സുകളിലാണ് സ്മിത്തിന്റെ നേട്ടം. 27 സെഞ്ചുറികളിലെത്താൻ സച്ചിനും കോലിക്കും വേണ്ടിവന്നത് 141 ഇന്നിങ്സുകളാണ്. നിലവിൽ അർധസെഞ്ചുറികളുടെ കാര്യത്തിലും സ്മിത്ത് തന്നെയാണ് കോലിക്ക് മുന്നിൽ. 29 അർധശതകങ്ങളാണ് സ്മിത്തിനുള്ളത്. കോലിക്കാവട്ടെ 23 എണ്ണവും.
അതേസമയം ടെസ്റ്റിലെ റൺവേട്ടക്കാരുടെ പട്ടികയിലും കോലിയെ സ്മിത്ത് മറികടന്നു. 87 ടെസ്റ്റുകളിലെ 147 ഇന്നിങ്സുകളിൽ നിന്നും 7318 റൺസാണ് കോലി നേടിയത്. 76 ടെസ്റ്റുകളിലെ 136 ഇന്നിങ്സുകളിൽ നിനും 7368 റൺസാണ് സ്മിത്ത് നേടിയുട്ടള്ളത്.
