ഏഷ്യാകപ്പ് മത്സരങ്ങള്‍ക്ക് മുന്നോടിയായി അയര്‍ലന്‍ഡിനെതിരെ ഇന്ത്യ കളിക്കുന്ന ടി20 പരമ്പരയ്ക്കുള്ള കഴിഞ്ഞ ദിവസമാണ് ബിസിസിഐ പ്രഖ്യാപിച്ചത്. ആഗസ്റ്റ് 18ന് നടക്കുന്ന പരമ്പരയില്‍ ഇന്ത്യയുടെ പ്രധാനതാരങ്ങള്‍ക്കെല്ലാം വിശ്രമം അനുവദിക്കപ്പെട്ടപ്പോള്‍ പരിക്കിലായിരുന്ന സൂപ്പര്‍ പേസര്‍ ജസ്പ്രീത് ബുമ്രയാണ് ടീമിന്റെ നായകസ്ഥാനം ഏറ്റെടുത്തിരിക്കുന്നത്.
പ്രധാന വിക്കറ്റ് കീപ്പറായി സഞ്ജു സാംസണ്‍ ടീമിലുണ്ടെങ്കിലും യുവതാരങ്ങള്‍ അണിനിരക്കുന്ന ടീമില്‍ ഏറെകാലമായി കളിച്ചുപരിചയമുള്ള സഞ്ജുവിന് പകരം റുതുരാജ് സിംഗിനെയാണ് ഇന്ത്യ ഉപനായകനാക്കിയിരിക്കുന്നത്. ഐപിഎല്ലില്‍ രാജസ്ഥാന്‍ റോയല്‍സിന്റെ നായകനായുള്ള മത്സരപരിചയമുള്ള താരത്തെ ബിസിസിഐ അവഹേളിച്ചതായാണ് സംഭവത്തില്‍ സഞ്ജു ആരാധകര്‍ പറയുന്നത്. ഒക്ടോബറില്‍ നടക്കുന്ന ഏഷ്യന്‍ ഗെയിംസിനുള്ള ഇന്ത്യന്‍ ടീമില്‍ നായകനാകുന്നത് റുതുരാജാണ്. ഈ കാരണം കൊണ്ടാകാം സഞ്ജുവിന് ഉപനായകസ്ഥാനത്തെക്ക് പരിഗണിക്കാതിരുന്നതെന്നാണ് അതേസമയം ക്രിക്കറ്റ് നിരീക്ഷകര്‍ പറയുന്നത്.
ഐപിഎല്ലില്‍ നായകനായി 45 മത്സരങ്ങള്‍ കളിച്ചിട്ടുള്ള സഞ്ജു 1304 റണ്‍സ് രാജസ്ഥാനായി നായകനെന്ന നിലയില്‍ നേടിയിട്ടുണ്ട്. സഞ്ജു നയിച്ച 22 മത്സരങ്ങളില്‍ രാജസ്ഥാന്‍ വിജയിച്ചപ്പോള്‍ 23 മത്സരങ്ങളില്‍ ടീം പരാജയപ്പെട്ടു. അതേസമയം ആഭ്യന്തര ക്രിക്കറ്റില്‍ നായകനായുള്ള പരിചയം മാത്രമാണ് റുതുരാജിനുള്ളത്. ഇന്ത്യന്‍ ജേഴ്‌സിയില്‍ 8 ടി 20 മത്സരങ്ങളില്‍ നിന്നും 135 റണ്‍സാണ് റുതുരാജ് ഇന്ത്യയ്ക്ക് വേണ്ടി നേടിയിട്ടുള്ളത്. ഇന്ത്യയ്ക്ക് വേണ്ടി ടി20യില്‍ സഞ്ജു സാംസണിന്റെ റെക്കോര്‍ഡും സമാനമാണ്. എന്നാല്‍ റുതുരാജിനേക്കാള്‍ പരിചയസമ്പത്തും ആരാധക പിന്തുണയുമുള്ള താരമാണ് സഞ്ജു സാംസണ്‍.
