സത്യന്‍ അന്തിക്കാടിന്‍റെ സിനിമകള്‍ക്കാണ് സാധാരണയായി പേരിടാന്‍ വൈകുന്നത്. എന്നാല്‍ ഒരു മമ്മൂട്ടിച്ചിത്രം ഏറെനാളായി പേരിനുവേണ്ടി കഷ്ടപ്പെടുകയായിരുന്നു. ശ്യാംധര്‍ സംവിധാനം ചെയ്യുന്ന ചിത്രത്തിന് പല പേരുകളും നോക്കി. ഒടുവില്‍ അവര്‍ ഒരു പേരുകണ്ടെത്തി - പുള്ളിക്കാരന്‍ സ്റ്റാറാ.
അതിനിടെ മമ്മൂട്ടി മറ്റൊരു സിനിമയിലേക്ക് കരാറായി. ശരത് സന്ദിത് സംവിധാനം ചെയ്യുന്ന ചിത്രം. ബാംഗ്ലൂരില്‍ ജയില്‍ പശ്ചാത്തലത്തിലാണ് ചിത്രം ഒരുങ്ങുന്നത്. ബാംഗ്ലൂരില്‍ എത്തിയപ്പോള്‍ മമ്മൂട്ടി മനസിലാക്കി - ഈ സിനിമയ്ക്കും പേരിട്ടിട്ടില്ല!
അപ്പോഴാണ് നടനും ഗായകനുമായ അരിസ്റ്റോ സുരേഷ് പാടിയ ‘പരോള്‍ കാലം...’ എന്നുതുടങ്ങുന്ന കാലം മമ്മൂട്ടി കേള്‍ക്കുന്നത്. ഉടന്‍ തന്നെ മമ്മൂട്ടി ക്ലാപ്പ് ബോര്‍ഡ് വാങ്ങി അതില്‍ പരോള്‍ എന്നെഴുതി ക്ലാപ്പടിച്ചു!
ആ പേര് എല്ലാവര്‍ക്കും ഇഷ്ടമാകുകയും ചെയ്തു. മിയയാണ് ചിത്രത്തിലെ ഒരു നായിക. മമ്മൂട്ടിയുടെ സഹോദരിയുടെ വേഷത്തിലാണ് മിയ എത്തുന്നത്. മുംബൈയില്‍ നിന്നുള്ള ഒരു മോഡലാണ് ചിത്രത്തിലെ മറ്റൊരു നായിക.
‘അങ്ങനെ തന്നെ നേതാവേ അഞ്ചട്ടെണ്ണം പിന്നാലേ’ എന്ന സിനിമ സംവിധാനം ചെയ്ത അജിത് പൂജപ്പുരയാണ് പരോളിന് തിരക്കഥയെഴുതുന്നത്. ഒരു ഫാമിലി ത്രില്ലര്‍ ആയിരിക്കും ഈ സിനിമ.
