ദങ്കല്‍ സംവിധായകനായ നിതീഷ് തിവാരിയുടെ സ്വപ്നചിത്രമായ രാമായണം 2024ല്‍ ഷൂട്ടിംഗ് ആരംഭിക്കുമെന്ന് റിപ്പോര്‍ട്ട്. രണ്‍ബീര്‍ കപൂര്‍ നായകനായെത്തുന്ന ചിത്രത്തില്‍ സായ് പല്ലവിയാണ് നായികയായി എത്തുന്നത്. കെജിഎഫിലൂടെ ഇന്ത്യയെ ആകെ ഞെട്ടിച്ച് യാഷ് ആയിരിക്കും ചിത്രത്തില്‍ രാവണനെ അവതരിപ്പിക്കുക എന്ന് നേരത്തെ റിപ്പോര്‍ട്ടുകള്‍ വന്നിരുന്നു. ഇപ്പോഴിതാ സിനിമയില്‍ ഹനുമാന്റെ വേഷത്തില്‍ ബോളിവുഡ് താരമായ സണ്ണി ഡിയോള്‍ എത്തുമെന്ന റിപ്പോര്‍ട്ടാണ് ഇപ്പോള്‍ പുറത്തുവരുന്നത്.
3 ഭാഗങ്ങളിലായിട്ടായിരിക്കും ചിത്രം പുറത്തുവരിക എന്നാണ് റിപ്പോര്‍ട്ട്. 2024 ഫെബ്രുവരി മുതല്‍ ഓഗസ്റ്റ് വരെയുള്ള കാലയളവില്‍ ആദ്യ ഭാഗത്തിന്റെ ചിത്രീകരണം നടക്കുമെന്നായിരുന്നു നേരത്തെ പുറത്തുവന്ന റിപ്പോര്‍ട്ടുകള്‍. ആലിയ ഭട്ടിന് സീതയാകാന്‍ ഓഫറുകള്‍ ഉണ്ടായിരുന്നെങ്കിലും ഡേറ്റിന്റെ പ്രശ്‌നങ്ങള്‍ കാരണമാണ് വേഷം സായ് പല്ലവിയിലെത്തിയത്. ഈ കാസ്റ്റിംഗ് നിരയിലേക്കാണ് ഇപ്പോള്‍ സണ്ണി ഡിയോളിന്റെ പേര് പറഞ്ഞുകേള്‍ക്കുന്നത്. അങ്ങനെ സംഭവിക്കുകയാണെങ്കില്‍ ഗദ്ദര്‍ 2 വിന് ശേഷം താരം അഭിനയിക്കുന്ന ചിത്രമാകും ഇത്. കൈകേയിയായി ലാറാ ദത്തയേയും വിഭീഷണനായി തെന്നിന്ത്യന്‍ താരം വിജയ് സേതുപതിയേയുമാണ് നിതീഷ് തിവാരി പരിഗണിക്കുന്നത്.
