മാളികപ്പുറം സംവിധായകന്‍ വിഷ്ണു ശശി ശങ്കര്‍ പുതിയ സിനിമ തിരക്കുകളിലേക്ക്. ദിലീപിനെ നായകനാക്കി അഭിലാഷ് പിള്ളയുടെ തിരക്കഥയില്‍ വമ്പന്‍ ഒരു ചിത്രം അണിയറയില്‍ ഒരുങ്ങുകയാണ്. കഥ ദിലീപിന് ഇഷ്ടമായെന്ന കാര്യം അഭിലാഷ് പിള്ള തന്നെയാണ് ഒരു അഭിമുഖത്തിനിടെ പറഞ്ഞത്. വരാനിരിക്കുന്ന സിനിമയെക്കുറിച്ച് ഒരു സൂചനയും തിരക്കഥാകൃത്ത് നല്‍കി.
ദിലീപിനെ പ്രേക്ഷകര്‍ എങ്ങനെയാണോ കാണാന്‍ ആഗ്രഹിക്കുന്നത് അതുപോലെയുള്ള ഒരു ചിത്രം ആയിരിക്കും തങ്ങള്‍ ഒരുക്കിയിരിക്കുന്നത് എന്നാണ് അഭിലാഷ് പറഞ്ഞത്. ദിലീപിന്റെ ആരാധകനായ തനിക്ക് അദ്ദേഹത്തിന്റെ കോമഡി വലിയ ഇഷ്ടമാണെന്നും അഭിലാഷ് കൂട്ടിച്ചേര്‍ത്തു.
മാളികപ്പുറം സിനിമ ആദ്യം ദിലീപിനെ വെച്ചായിരുന്നു പ്ലാന്‍ ചെയ്തിരുന്നത്. മാളികപ്പുറം കണ്ട് ദിലീപ് തന്നെ വിളിച്ചെന്നും അദ്ദേഹം തന്നോട് ഒരുപാട് സംസാരിച്ചെന്നും ഒരുമിച്ച് ഒരു സിനിമ ചെയ്യണമെന്ന് ദിലീപ് ആണ് തന്നോട് പറഞ്ഞതെന്നും അഭിലാഷ് പിള്ള വെളിപ്പെടുത്തി. അടുത്തവര്‍ഷം സിനിമയ്ക്ക് തുടക്കമാകും.
മന്ത്രമോതിരം, മിസ്റ്റര്‍ ബട്‌ലര്‍, കുഞ്ഞിക്കൂനന്‍ തുടങ്ങിയ സിനിമകള്‍ ഒരുക്കിയ സംവിധായകന്‍ ശശിശങ്കറിന്റെ മകനാണ് വിഷ്ണു ശശിശങ്കര്‍.
