മമ്മൂട്ടിയുടെ ആരാധകര്‍ കാത്തിരിക്കുന്ന സിനിമയാണ് ടര്‍ബോ. കാലങ്ങള്‍ക്ക് ശേഷം വീണ്ടും മെഗാസ്റ്റാറിനെ ആക്ഷന്‍ പടത്തില്‍ കാണാന്‍ ആകുമെന്ന് ത്രില്ലിലാണ് സിനിമ പ്രേമികള്‍.ആക്ഷന്‍ കോമഡി ഴോണറിലുള്ള മാസ് ചിത്രമാണ് ടര്‍ബോ.
മെയ് 23ന് ലോകമെമ്പാടുമുള്ള തിയേറ്ററുകളില്‍ റിലീസ് ചെയ്യുന്ന ടര്‍ബോയുടെ അഡ്വാന്‍സ് ബുക്കിംഗ് നേരത്തെ ആരംഭിച്ചതാണ്. മുന്‍കൂര്‍ ബുക്കിങ്ങില്‍ വന്‍ കുതിപ്പാണ് ഇപ്പോള്‍ കാണാനാകുന്നത്. വൈശാഖ് സംവിധാനം ചെയ്യുന്ന സിനിമ റിലീസിന് രണ്ടുദിവസം ബാക്കിനില്‍ക്കെ രണ്ടുകോടിയില്‍ കൂടുതല്‍ നേടിക്കഴിഞ്ഞു.
മമ്മൂട്ടി കമ്പനിയുടെ പാനലില്‍ നിര്‍മ്മിക്കുന്ന ബിഗ് ബജറ്റ് ചിത്രമാണിത്.ചിത്രത്തിന്റെ കേരളാ ഡിസ്ട്രിബ്യൂഷന്‍ വേഫറര്‍ ഫിലിംസും ഓവര്‍സീസ് പാര്‍ട്ണര്‍ ട്രൂത്ത് ഗ്ലോബല്‍ ഫിലിംസുമാണ്.
ടര്‍ബോ ജോസ് എന്ന കഥാപാത്രത്തെയാണ് മമ്മൂട്ടി അവതരിപ്പിക്കുന്നത്. മമ്മൂട്ടിയ്ക്ക് ഒപ്പം കന്നഡ താരം രാജ് ബി ഷെട്ടിയും തെലുങ്ക് നടന്‍ സുനിലും പ്രധാന കഥാപാത്രങ്ങളെ അവതരിപ്പിക്കുന്നു.
മധുര രാജ എന്ന ഹിറ്റ് ചിത്രത്തിനുശേഷം വൈശാഖും മമ്മൂട്ടിയും ഒന്നിക്കുമ്പോള്‍ പ്രതീക്ഷകള്‍ വലുതാണ്.ടര്‍ബോയുടെ തിരക്കഥ ഒരുക്കിയിരിക്കുന്നത് മിഥുന്‍ മാനുവല്‍ തോമസ് ആണ്. ആക്ഷന്‍ ഒപ്പം കോമഡിക്കും പ്രാധാന്യം നല്‍കുന്നതാകും ചിത്രം. 70 കോടി ബജറ്റിലാണ് സിനിമ ഒരുങ്ങുന്നത്.ജസ്റ്റിന്‍ വര്‍ഗ്ഗീസ് സംഗീതം നല്‍കുന്ന ചിത്രത്തിലെ ആക്ഷന്‍ രംഗങ്ങള്‍ വിയറ്റ്‌നാം ഫൈറ്റേര്‍സാണ് കൈകാര്യം ചെയ്യുന്നത്. വിഷ്ണു ശര്‍മ്മയാണ് ഛായാഗ്രഹകന്‍.
