കൈതി എന്ന സിനിമയിലൂടെ തെന്നിന്ത്യ മുഴുവന്‍ ശ്രദ്ധ നേടിയ ബാലതാരമാണ് മോണിക്ക ശിവ. മലയാളത്തില്‍ പ്രീസ്റ്റ് അടക്കമുള്ള സിനിമകളില്‍ അഭിനയിച്ച മോണിക്ക പക്ഷേ കൈതി ഇറങ്ങി 5 വര്‍ഷം പിന്നിടുമ്പോള്‍ ബാലതാരം എന്ന രൂപത്തില്‍ നിന്നും ഒരുപാട് മാറിയിരിക്കുന്നു. നിലവിലെ 14 വയസുകാരിയായ താരത്തെ ദില്ലിയുടെ മകളായി ഇനി അഭിനയിപ്പിക്കാനാവില്ലെന്നാണ് താരത്തിന്റെ പുതിയ ചിത്രങ്ങള്‍ പുറത്തുവന്നതോടെ ആരാധകര്‍ പറയുന്നത്.
എസ് എസ് മ്യൂസിക് ചാനലിന് വേണ്ടി നടത്തിയ ഫോട്ടോഷൂട്ടാണ് ആരാധകരെ ഞെട്ടിച്ചിരിക്കുന്നത്. വര്‍ഷങ്ങള്‍ക്ക് മുന്‍പ് കണ്ട ബാലതാരമായ മോണിക്ക ഇത്രയും വളര്‍ന്ന് പോയെന്ന് വിശ്വസിക്കാനാവുന്നില്ലെന്ന് പലരും കമന്റുകളായി പറയുന്നു. കൈതി 2 ഇറങ്ങുമ്പോള്‍ ബാലതാരമായി ഇനി അഭിനയിക്കാനാവില്ല എന്നാണ് ചിത്രങ്ങള്‍ക്ക് കീഴില്‍ പലരും പറയുന്നത്. തമിഴിലെ അടുത്ത നായികയായി മോണിക്കയെ പരിഗണിക്കാമെന്ന് പറയുന്നവരും ഏറെയാണ്.
അതേസമയം ഏറെ പോസിറ്റീവായാണ് ഈ കമന്റുകളെ മോണിക്ക എടുത്തിരിക്കുന്നത്. കൈതി സിനിമയുമായി ബന്ധപ്പെട്ട ട്രോളും താരം തന്റെ ഇന്‍സ്റ്റഗ്രാമില്‍ പങ്കുവെച്ചിട്ടുണ്ട്. 2017ല്‍ ഭൈരവ എന്ന സിനിമയിലൂടെയാണ് മോണിക്ക ആദ്യമായി സ്‌ക്രീനിലെത്തിയത്. രാക്ഷസന്‍, കൈതി,വിക്രം, മലയാളത്തില്‍ മമ്മൂട്ടിയ്‌ക്കൊപ്പം പ്രീസ്റ്റ് എന്നീ സിനിമകളിലും മോണിക്ക അഭിനയിച്ചിട്ടുണ്ട്.
